做細辰候，最希望的蜀樣事計，就是學堂每蜀季辦蜀巡的郊遊活動。雖然講每蜀次都是去「燈塔」環蜀環。但是，蜀想遘，有耐伓使讀書、上課，故有野𡖯碎乇食，心就歡喜無際呵了。 全世界有百分七十的地方是海，島嶼共島嶼之間，如果需要開船來往的話，起燈塔就變野重要的事計了。尤其是著勃暴、風時雷雨、落霧天共無月無星斗的暝晡。燈塔發散出的光，就是引導船避開礛磹的重要方式。 馬祖地區有兩座燈塔，歷史都超過蜀百年，是地區野重要的古蹟。兩座燈塔都是由英國儂起的，除去燈塔本身以外，邊斗故有幾間四方八正的白厝。裡勢有保存最詳細的歷史資料跟相關文物。只兩座燈塔經過歷史風霜，固加啦本身的形款有外國樣式，固予講每蜀年都有野𡖯儂來參觀骹遛。 「東莒燈塔」是一八七二年起的，伊最特別的地方是全部使花崗岩起的。敆燈塔門前，有蜀面白白的牆，守燈塔的儂遇著風透的日子，也會適勢的去燈塔裡勢作事計。 白白的東莒燈塔，靜靜略企敆滬裡石頭砪厝山頂，海墘石壁、藍天草地互相配合之下，看起呵純潔無瑕。 馬祖的第二座燈塔是東引燈塔，也是儂家國家最北的燈塔，是一九零四年起的，有儂號「東引別墅」。燈塔位處著礛磹海墘懸頂，蜀墿都勃 滇呵馬祖才有的特別植物，逢儂看見都野歡喜。彎彎的墿囝罔爬罔懸，海水山景盡收眼底，儂家來只心情會罔來罔寬呵。 隨著日頭東昇西落、海水來去，燈塔的光芒，盡像爸嬭的愛心，照耀烏暗的大海，揢每蜀隻離開厝的儂指引轉厝的方向。