往日老蜀輩大儂都希望倪囝羔平安勃大，透底都是犬囝、憨囝咧告，伊是憨憨呆呆，天皇帝聽著了，伓是聰明倪囝羔，就𣍐討伊轉來! 日日工落班我轉厝，都是看見著的:仰著面，列開缺牙的喙，就對我露出憨憨的笑面，樣式憨氣復快樂，伊就是我依爹啦，總款憨氣的面相，真正共伊做細的名字蜀樣樣。 我的依爹沒見過伊的依爹，伊是蜀個沒見過依爹面的倪囝，做細是蜀個拖油瓶，再嫁的依嬭伓捌字，𣍐能揢伊號名，後娘爸更更無管伊這個跟別儂姓的倪囝，故此講伊儷蜀個做細的名字－號「憨憨」 。 無讀過書的依爹，自家半暝學仂囝字，遘終尾為自家號啦「必清」 。 結婚以後，伊的希望是多養幾隻倪囝 ，有耐補伊做細蜀隻儂無儂商量的日子。 分開食的辰候，仂囝家伙都無分著，但是蜀隻儂的憨憨依爹，為了乞倪囝好的生活，吶自家無停無歇拼命的做，蜀心為蜀厝倪囝打算，替儂家打造蜀個遮風避雨幸福溫暖的厝；伊和部隊做麵條生意，開了村咧頭蜀間雜貨店，伊養過鴨、做過蝦油共醋，伊搏䋾趁錢，讓我們𣍐煩惱的讀書學藝。為了做麵條生意，蜀隻儂來遘萬華買著發電機，發電機老闆教伊，野有耐發電呵，聽著老闆的解說後，伊就多買著發電材料，轉呵家鄉有了 50 燭光的電光代替煤油燈，外嬤厝、依嬤厝先後有了電光照明，厝邊頭尾都來問，希望有耐揢伊各儂裝燈，依爹就揢村咧蜀主蜀主牽電線，讓村咧變馬祖最早暝晡有燈光的地方，厝咧收入野增加；伊講過:野𣍐捌年輕辰候典哪來的肝膽，讓伊無回頭的拼命做，真正是「天下爸嬭心」，為父則強。 依爹平常對儂家要求野嚴格, 伓啻講「行得正、坐得直、站有站相、坐有坐相、食不言、寢不語…」 。固有講儂蜀世:「事計多做、話少講」，儂家都記定定。雖然，伊是個極端 傳統的儂，但有好乇，都𣍐捨自家蜀隻吃， 一定共倪囝齊分享。 對倪囝的教養，伊有自家想法，對儂家的教育是野開通，稠稠唸:「每蜀隻儂一定要讀書，老啦乍快活」 。民國五十年代馬祖生活艱難是𣍐看重教育的，尤其是姿儂囝，爸嬭讓姿儂囝讀遘國中就算野好呵，無幾主儂會肯姿儂囝讀書，固加啦當時馬祖是蜀個野窮野苦𣍐飯食的年代，生活都野艱難，再講姿儂囝是賠錢貨的傳統觀念，都敆咧大儂心兜；但是伊會捨賣黃金籌錢乞依姐來臺灣讀書，嚽在家鄉夫塊引起野多束儂搖頭嘆息，怎合花錢揢姿儂囝乞讀書？卜早早讓姿儂囝趁錢 乍是呀！講伊「真真是憨囝」。 做姿儂囝的我，實在野感謝依爹深遠的眼光，讓儂家厝咧姿儂囝有耐接受高等教育，擁有自家蜀片天，有耐追求自家的夢想固有舒暢自由的生活，嚽都是我親愛的憨囝依爹賜共我的。 儂說年歲慢慢大，會「返老還童」仱仱的依爹什乇都𣍐記咧，就像蜀隻三歲倪囝，但是蜀使馬祖話告伊，伊就目睭開開、喙笑笑，真像轉遘舊底的日子，我現在照顧伊，就像 伊舊底陪儂家兄弟姊妹勃大蜀樣樣! 我的憨囝依爹呀！蜀世就像伊的名字－必清， 「心清似風、心明如月」 。願儂家兄弟姊妹有明亮的前景，蜀世快活!