馬祖冬天風野透，天氣野凊。 老儂講：食老酒對身體野好。固此，冬天蜀遘，每蜀工食暝時間，個郎村咧空氣都飄著老酒味。 儂家厝裡野蜀樣，冬天食暝辰候，依嬭一定會揢依爹暖蜀杯老酒。酒暖好，鼎蓋蜀翻起呵，煙馬上竄起，滿厝都是老酒氣味，野𣆯野𣆯都𣍐散。厝裡暖暖的,身體暖暖的,心野暖暖的。 酒蜀暖好，依爹等𣍐及，馬上就叫依嬭掏乞伊啜，啜蜀喙儷，一定會講：「野好。」看伊蜀面滿足的樣式，野像無什哪乇比老酒更更好食的。 依爹愛食酒，尤其是自家做的馬祖老酒；我厝的兄弟姊妹都像依爹，盡會食酒，吶啦剩我，野驚鼻著酒味，更更伓使講食有老酒味的乇。 冬天做風勃暴𡖯，依爹驚儂家寒呵，心想紅蟳加秫米燉老酒食啊野補，稠稠會吼依嬭燉乞儂家蜀厝儂齊享受，野稠稠帶魚加老酒燉，固有煮老酒線麵；無想遘伓捌世的我，因為無耐接受食的乇當中有老酒味，固此伓食，無管依嬭總款勸，脾氣野臭硬的我就是伓食，依爹氣得想掏扁擔拍我，都是依嬭對手勸依爹，改來耐心勸我：「食仂囝覷蜀覷嘛，盡好食呵」 。 依嬭䟰呵以後，依爹習慣固是在冬天食暝辰候暖蜀杯老酒，但是伊野少講話，吶自家靜靜略啜，𣍐像固底曲馬祖辰候，大聲講話，啜蜀喙酒，配蜀喙魚乾固是鴨肉，喙咂咂儷，滿 意的講：「好酒，食儷蜀身野透骹。」 依嬭䟰呵以後，依爹野無心緒做老酒，儂家就去買馬祖老酒起乞伊食，但是，伊啜儷伓是講這紅麴𣍐好、就是講顏色𣍐對、固有什哪水不甜、味𣍐香。但是我會捌，真正的原因 是伊嬭不敆伊身兜，酒就𣍐甜𣍐暖呵了。 蜀遘冬天凊凊暝晡，大家都講老酒好，自家做娘嬭以後，野煮蜀碗蛋酒、老酒線麵，兩個姿儂囝食呵蜀面紅丹丹. 骹手暖呼呼、蜀冬天都伓驚凊，者辰候乍會捌馬祖老酒正正是好 乇，野乍體會遘「天下爸嬭心」。 為了留下娘嬭的愛，為了討轉蜀冬天故鄉空氣中飄散著暖暖的酒意，靜靜略聞，捏著鼻慢慢的啜，酒味𣍐苦澀呵，有的吶剩娘嬭滿滿的、暖暖的愛，回甘在喙咧，直透囥著心咧。