早起頭，珍珍伊婆由眠床爬起呵，伊行啊行，行遘門口，看見隔壁厝阿珠的孫，出門共同學骹遛。 珍珍心咧想:「野好啊，伊有朋友有耐伴，𣍐像我，都無朋友。」 珍珍行啊行，行遘公園，野𣆯無見著面的小惠共伊擛手拍招呼，小惠手掏蜀其袋袋講:「珍珍啊，我買野𡖯水果，食𣍐完，汝掏仂囝轉去吧!」 珍珍心咧想:「乞我汝剩底的乇，如果汝是我朋友，我一定會送汝汝喜歡的乇!」 珍珍拍開小惠送伊的乇，底勢有野𡖯蘋果，伊心咧想:「哇，我運氣真好，正好是我最愛食的蘋果!」 珍珍行啊行，行遘市場街，賣鹹餅的老闆手掏蜀其袋袋講:「珍珍啊，汝安無耐幫我去村長辦公室掏鄉公所送的糞埽袋嚕?我忘記掏了。」 珍珍心咧想:「有需要幫忙的辰候乍會想遘我，如果汝是我朋友，我一定會敆自家掏的辰候順便幫汝掏!」 珍珍拍開老闆送伊的袋袋，底勢有蜀包糞埽袋，伊心咧想:「哇，我運氣真好，無需要去村長辦公室就有糞埽袋了!」 珍珍行啊行，行遘自家厝門口，看見隔壁厝阿珠的孫轉厝了。 伊看見珍珍講:「珍珍伊婆，汝手掏的袋袋安是小惠伊姨共鹹餅老闆送的啦?」 珍珍講:「汝怎講會捌?」 阿珠的孫講:「我敆水果店聽著小惠伊姨講伊想買汝愛食的水果，敆鹹餅店，聽遘老闆笑咧講，伊幫汝掏糞埽袋的辰候，忘記掏伊自家的。我野希望有耐像汝蜀樣，有只蠻好的朋友伴我!」