外大嬤的墓地是著珠螺，蜀其僅少儂會遘的山陂。每蜀年去硩紙，都著穿過蜀片勃野密的青竹囝，尾斗會看見蜀塊比我兩邊手固大的石頭砪，企敆彼哪，夫塊就是我外大嬤的墓地。 依媽講彼辰候，底儂老了伓是使蒿蘺包儷，埋敆自家畈地？再企蜀塊石頭砪，就當著是親儂過後住的厝。 石頭砪後斗饃起的塗堆，真像依媽帶身喜的腹栳。外大嬤漢馬一定野嫩，入塗辰候身軀可能是彎的，就像伲囝囝窩敆塗地娘娘心兜蜀樣樣。 每蜀年，雜木 臭 野草(細竹、槭葉牽牛、風藤、薛荔、海桐苗)，野像有儂哩教，著墓地攤骹舞手；我共依媽都著動手，揢雜木 臭 野草逐出墓地，再寬寬心拾刷清楚。揢紙錢硩敆石頭砪底下，都做平搭以後，最後乍開始拜祭外大嬤。 依媽點香，炙紅的香線火煙慢慢昇天，外大嬤會捌儂家來了。 「依嬤！我帶姿娘囡依馨來看汝了喔！儂家準備野多 束 錢紙、箔、固有元寶，汝著來掏啊！依公已無塊討了，汝著自家去討，討著了，著記來錢著齊 齊使啊！」 依媽手捻香線，嘴裡使馬祖話輕輕聲唸，野像伊講的話，會跟火煙上天，傳乞百幾年以前的大公、大嬤，希望伊各儂著天上有食有頌，安安心過日子。